hoti nahin bimar-e-mohabbat ko shifa bhi

hotī nahīñ bīmār-e-mohabbat ko shifā bhī

ye dard huā kartā hai ḳhud apnī davā bhī

sab un ke sitam mere liye ain karam haiñ

hai un kī jafāoñ meñ ik andāz-e-vafā bhī

ik rabt bahut hai na sahī chashm-e-ināyat

mujh ko nahīñ mahrūmī-e-qismat kā gila bhī

be-vaj.h nahīñ sahme hue ahl-e-gulistāñ

badlī nazar aatī hai gulistāñ kī fazā bhī

naġhmāt-e-tarab-ḳhez bahut ḳhuub haiñ lekin

mumkin ho to sun TuuTe hue dil kī sadā bhī

us sāhib-e-himmat kā hai jiinā mire nazdīk

jiine kī duā detī hai ḳhud jis ko qazā bhī

har-chand hai nazroñ se nihāñ dost kā jalva

ho dīda-e-bīnā to vo hai jalva-numā bhī

ḳhvāhish hai karam kī na tamannā-e-navāzish

uThte nahīñ ab haath kabhī bahr-e-duā bhī

be-jins amal rāhat-e-uqbā ke haiñ tālib

kyā ḳhuub hai ḳhush-fahmī-e-arbāb-e-safā bhī

taslīm ki āsāñ hai 'qamar' da.avā-e-ulfat

āsāñ to nahīñ jāda-e-taslīm-o-razā bhī

hoti nahin bimar-e-mohabbat ko shifa bhi

ye dard hua karta hai KHud apni dawa bhi

sab un ke sitam mere liye ain karam hain

hai un ki jafaon mein ek andaz-e-wafa bhi

ek rabt bahut hai na sahi chashm-e-inayat

mujh ko nahin mahrumi-e-qismat ka gila bhi

be-wajh nahin sahme hue ahl-e-gulistan

badli nazar aati hai gulistan ki faza bhi

naghmat-e-tarab-KHez bahut KHub hain lekin

mumkin ho to sun TuTe hue dil ki sada bhi

us sahib-e-himmat ka hai jina mere nazdik

jine ki dua deti hai KHud jis ko qaza bhi

har-chand hai nazron se nihan dost ka jalwa

ho dida-e-bina to wo hai jalwa-numa bhi

KHwahish hai karam ki na tamanna-e-nawazish

uThte nahin ab hath kabhi bahr-e-dua bhi

be-jins amal rahat-e-uqba ke hain talib

kya KHub hai KHush-fahmi-e-arbab-e-safa bhi

taslim ki aasan hai 'qamar' dawa-e-ulfat

aasan to nahin jada-e-taslim-o-raza bhi