hua hai hukm zaKHm-e-dil purana bhul jaun

huā hai hukm zaḳhm-e-dil purānā bhuul jā.ūñ

ye merī zindagī kā hai asāsa bhuul jā.ūñ

sitam bhūlūñ karam bhūlūñ 'ajab mushkil meñ dil hai

rakhūñ maiñ yaad kyā kyā aur kyā kyā bhuul jā.ūñ

hayūlā bhī nazar aa.e agar us kā kabhī to

uThī palkeñ maiñ ghanToñ tak girānā bhuul jā.ūñ

basā luuñ dil meñ yā āñkhoñ meñ kar luuñ qaid us ko

jahāñ Thahrā.ūñ Thahrā kar Thikāna bhuul jā.ūñ

mire hāthoñ meñ aa jaa.e jo us kā haath to phir

maiñ apnī zindagī kī har tamanna bhuul jā.ūñ

mulāqāteñ mudārāteñ vo barsāteñ vo rāteñ

nahīñ mumkin ki sab bāteñ maiñ tanhā bhuul jā.ūñ

mujhe to kār-e-duniyā se nahīñ miltī hai fursat

magar jab zikr terā ho maiñ duniyā bhuul jā.ūñ

hua hai hukm zaKHm-e-dil purana bhul jaun

ye meri zindagi ka hai asasa bhul jaun

sitam bhulun karam bhulun 'ajab mushkil mein dil hai

rakhun main yaad kya kya aur kya kya bhul jaun

hayula bhi nazar aae agar us ka kabhi to

uThi palken main ghanTon tak girana bhul jaun

basa lun dil mein ya aankhon mein kar lun qaid us ko

jahan Thahraun Thahra kar Thikana bhul jaun

mere hathon mein aa jae jo us ka hath to phir

main apni zindagi ki har tamanna bhul jaun

mulaqaten mudaraaten wo barsaten wo raaten

nahin mumkin ki sab baaten main tanha bhul jaun

mujhe to kar-e-duniya se nahin milti hai fursat

magar jab zikr tera ho main duniya bhul jaun