hua na KHatm azabon ka silsila ab tak

huā na ḳhatm azāboñ kā silsila ab tak

ḳhizāñ kī zad meñ bhī ik phuul hai harā ab tak

milā thā zahr jo virse meñ pī rahe haiñ ham

na us ne sulh kī sochī na maiñ jhukā ab tak

ye sach hai vahm ke daldal se lauT aayā huuñ

magar yaqīn kā dhuñdlā hai aa.ina ab tak

inhī ġhamoñ kā vo ik din hisāb māñgegā

falak se jo mire kashkol meñ paḌā ab tak

abhī abhī mirī āñkhoñ ne kho diyā us ko

vo dard ban ke mirī siskiyoñ meñ thā ab tak

na jaane kitnī balī dī hai rat-jagoñ kī use

magar milā na vo ḳhvāboñ kā devtā ab tak

judā huī thī jahāñ mil ke zindagī ik din

bhaTak rahī hai vahīñ merī aatmā ab tak

hua na KHatm azabon ka silsila ab tak

KHizan ki zad mein bhi ek phul hai hara ab tak

mila tha zahr jo wirse mein pi rahe hain hum

na us ne sulh ki sochi na main jhuka ab tak

ye sach hai wahm ke daldal se lauT aaya hun

magar yaqin ka dhundla hai aaina ab tak

inhi ghamon ka wo ek din hisab mangega

falak se jo mere kashkol mein paDa ab tak

abhi abhi meri aankhon ne kho diya us ko

wo dard ban ke meri siskiyon mein tha ab tak

na jaane kitni bali di hai rat-jagon ki use

magar mila na wo KHwabon ka dewta ab tak

juda hui thi jahan mil ke zindagi ek din

bhaTak rahi hai wahin meri aatma ab tak