hudud-e-jaan mein had-e-na-rasa se aaya hun

hudūd-e-jāñ meñ had-e-nā-rasā se aayā huuñ

maiñ apne aap meñ lā-intihā se aayā huuñ

chamak rahī hai jabīñ par safar kī dhuul abhī

zamīñ kī dhund meñ raushan fazā se aayā huuñ

maiñ kis kī aañkh meñ ta.abīr kī tarah jāgūñ

sunahrā ḳhvāb huuñ aur qartaba se aayā huuñ

mirī hathelī pe raushan najāt kā lamha

maiñ aaj vādī-e-hamd-o-sanā se aayā huuñ

mujhe sambhāl ke rakh shahr-e-be-lihāz ki maiñ

kisī faqīr-manash kī duā se aayā huuñ

zavāl-e-ahd to shāyad mujhe na pahchāne

maiñ ik havāla huuñ aur karbalā se aayā huuñ

hudud-e-jaan mein had-e-na-rasa se aaya hun

main apne aap mein la-intiha se aaya hun

chamak rahi hai jabin par safar ki dhul abhi

zamin ki dhund mein raushan faza se aaya hun

main kis ki aankh mein tabir ki tarah jagun

sunahra KHwab hun aur qartaba se aaya hun

meri hatheli pe raushan najat ka lamha

main aaj wadi-e-hamd-o-sana se aaya hun

mujhe sambhaal ke rakh shahr-e-be-lihaz ki main

kisi faqir-manash ki dua se aaya hun

zawal-e-ahd to shayad mujhe na pahchane

main ek hawala hun aur karbala se aaya hun