hudud-e-jaan se aage nikal bhi sakta hai

hudūd-e-jān se aage nikal bhī saktā hai

ye sail-e-ishq hai sab kuchh nigal bhī saktā hai

makīn-e-arsh sahī māvarā-e-ġham to nahīñ

ki husn chāñd kā ik shab meñ Dhal bhī saktā hai

vo jis pe ghar nahīñ bante kabhī parindoñ ke

vo peḌ apne hī saa.e se jal bhī saktā hai

maiñ jāntā huuñ saḳhāvat vafā ke sahrā kī

hamārī eḌī se chashma ubal bhī saktā hai

gurez-pā na ho ujḌe hue makānoñ se

khañDar kī tah se ḳhazāna nikal bhī saktā hai

ye sarsarī sā ta'alluq hai mustaqil na samajh

vo ain vaqt pe rasta badal bhī saktā hai

tū do ghaḌī hī agar saath chal paḌe hamdam

azāb-e-hijr mire sar se Tal bhī saktā hai

hudud-e-jaan se aage nikal bhi sakta hai

ye sail-e-ishq hai sab kuchh nigal bhi sakta hai

makin-e-arsh sahi mawara-e-gham to nahin

ki husn chand ka ek shab mein Dhal bhi sakta hai

wo jis pe ghar nahin bante kabhi parindon ke

wo peD apne hi sae se jal bhi sakta hai

main jaanta hun saKHawat wafa ke sahra ki

hamari eDi se chashma ubal bhi sakta hai

gurez-pa na ho ujDe hue makanon se

khanDar ki tah se KHazana nikal bhi sakta hai

ye sarsari sa ta'alluq hai mustaqil na samajh

wo ain waqt pe rasta badal bhi sakta hai

tu do ghaDi hi agar sath chal paDe hamdam

azab-e-hijr mere sar se Tal bhi sakta hai