hudud-e-jalwa-e-kaun-o-makan mein rahte hain

hudūd-e-jalva-e-kaun-o-makāñ meñ rahte haiñ

na jaane ahl-e-nazar kis jahāñ meñ rahte haiñ

hameñ to mausam-e-gul ne hī kar diyā rusvā

sunā hai log salāmat ḳhizāñ meñ rahte haiñ

ayaañ hai un ke sitam se hamārā zauq-e-niyāz

ham aag ban ke mizāj-e-butāñ meñ rahte haiñ

kahāñ talāsh karegī hameñ bahār ki ham

kabhī qafas meñ kabhī āshiyāñ meñ rahte haiñ

vo raaz jin kā laboñ ne na ehtirām kiyā

barahna ho ke dil-e-rāz-dāñ meñ rahte haiñ

ġhurūr-e-hikmat-o-dānish meñ jhūmne vaalo

kuchh ahl-e-dil bhī isī ḳhāk-dāñ meñ rahte haiñ

'qatīl' arz-e-vatan meñ bhī huuñ maiñ ḳhāk-basar

mire nasīb kahīñ āsmāñ meñ rahte haiñ

hudud-e-jalwa-e-kaun-o-makan mein rahte hain

na jaane ahl-e-nazar kis jahan mein rahte hain

hamein to mausam-e-gul ne hi kar diya ruswa

suna hai log salamat KHizan mein rahte hain

ayan hai un ke sitam se hamara zauq-e-niyaz

hum aag ban ke mizaj-e-butan mein rahte hain

kahan talash karegi hamein bahaar ki hum

kabhi qafas mein kabhi aashiyan mein rahte hain

wo raaz jin ka labon ne na ehtiram kiya

barahna ho ke dil-e-raaz-dan mein rahte hain

ghurur-e-hikmat-o-danish mein jhumne walo

kuchh ahl-e-dil bhi isi KHak-dan mein rahte hain

'qatil' arz-e-watan mein bhi hun main KHak-basar

mere nasib kahin aasman mein rahte hain