hue hain phir se andheron ke hausle raushan

hue haiñ phir se añdheroñ ke hausle raushan

qalam sambhāl añdhere ko jo likhe raushan

ye sūkhī jhīleñ thiiñ in meñ kahāñ se aa.ī baaḌh

hamārī āñkhoñ meñ haiñ kis ke tajrabe raushan

ye aur baat havā ne bujhā diye kaafī

tumhārī yaad ke lekin haiñ kuchh diye raushan

tumheñ chamaknā hai to likkho ham ko safhoñ par

hamāre hone se hote haiñ hāshiye raushan

udaas shaam hai aur saare bench ḳhālī haiñ

koī zamāna thā hote the qahqahe raushan

zarā sī der ko saaye meñ un ke aayā thā

yaqīn jaano hue saare zāviye raushan

mire qarīb koī ḳhvāb kaise aa paatā

ki mujh meñ rahte haiñ barsoñ se ratjage raushan

ab un pe dhund qayāmat kī dhund taarī hai

tumhāre saath jo hote the marhale raushan

haqīqatan use dekhā kahāñ hai muddat se

haiñ jis kī diid ke ḳhvāboñ meñ vāqiye raushan

gire jo yaad kī jacket pe yaad ke phāhe

añdhere dil meñ hue ḳhuub valvale raushan

kiyā muaaf jo ik dūsre se duur rahe

qarīb aa.e, hue saare fāsle raushan

maiñ tīrgī sahī lekin kabhī kabhī mujh meñ

huzūr koī to pahlū nikāliye raushan

hue hain phir se andheron ke hausle raushan

qalam sambhaal andhere ko jo likhe raushan

ye sukhi jhilen thin in mein kahan se aai baDh

hamari aankhon mein hain kis ke tajrabe raushan

ye aur baat hawa ne bujha diye kafi

tumhaari yaad ke lekin hain kuchh diye raushan

tumhein chamakna hai to likkho hum ko safhon par

hamare hone se hote hain hashiye raushan

udas sham hai aur sare bench KHali hain

koi zamana tha hote the qahqahe raushan

zara si der ko saye mein un ke aaya tha

yaqin jaano hue sare zawiye raushan

mere qarib koi KHwab kaise aa pata

ki mujh mein rahte hain barson se ratjage raushan

ab un pe dhund qayamat ki dhund tari hai

tumhaare sath jo hote the marhale raushan

haqiqatan use dekha kahan hai muddat se

hain jis ki did ke KHwabon mein waqiye raushan

gire jo yaad ki jacket pe yaad ke phahe

andhere dil mein hue KHub walwale raushan

kiya muaf jo ek dusre se dur rahe

qarib aae, hue sare fasle raushan

main tirgi sahi lekin kabhi kabhi mujh mein

huzur koi to pahlu nikaliye raushan