hue jo panw se mazur hum jabin se chale

hue jo paañv se ma.azūr ham jabīñ se chale

junūn-e-shauq meñ ye silsile hamīñ se chale

hamārā sar hī hamesha nishāna bantā hai

kisī bhī samt se patthar chale kahīñ se chale

khule tarīqe se ham par chale nahīñ ḳhanjar

agar chale bhī to yāroñ kī āstīñ se chale

zarā bhī dosh nahīñ is meñ āsmānoñ kā

bagūle fitnoñ ke jab bhī chale zamīñ se chale

farāz-e-dār kī azmat meñ kuchh kalām nahīñ

buland-baḳhtī ke sab silsile yahīñ se chale

ye pesh-raft kī hai shart-e-avvalīñ 'manshā'

ki chalne vaalā aTal azm-e-pur-yaqīñ se chale

hue jo panw se mazur hum jabin se chale

junun-e-shauq mein ye silsile hamin se chale

hamara sar hi hamesha nishana banta hai

kisi bhi samt se patthar chale kahin se chale

khule tariqe se hum par chale nahin KHanjar

agar chale bhi to yaron ki aastin se chale

zara bhi dosh nahin is mein aasmanon ka

bagule fitnon ke jab bhi chale zamin se chale

faraaz-e-dar ki azmat mein kuchh kalam nahin

buland-baKHti ke sab silsile yahin se chale

ye pesh-raft ki hai shart-e-awwalin 'mansha'

ki chalne wala aTal azm-e-pur-yaqin se chale