hue jo qatl un ka hai wahi gham-KHwar bolega

hue jo qatl un kā hai vahī ġham-ḳhvār bolegā

maze kī baat hai qātil kī jai-jai-kār bolegā

tabī.at ho ki niyyat ho haqīqat hogī zāhir hī

tirī ḳhāmoshiyoñ meñ bhī tirā kirdār bolegā

sitam-gar ne jo karnā thā kiyā lekin sitam ye hai

mire dil ko yaqīñ thā ki koī ġham-ḳhvār bolegā

kahānī zindagī kī ek dariyā kī haqīqat hai

kināre kuchh nahīñ kahte magar majdhār bolegā

chhupā.e laakh tū is ko hai aisī raushnī ye to

tirī āñkhoñ se chamkegī tirā inkār bolegā

nahīñ boleñge ham lekin hamārī baat bolegī

jise hai bolne kī lat vahī har baar bolegā

patā sab ko hai lāchārī ġharībī kā muqaddar hai

savere dekhnā kyā kyā magar aḳhbār bolegā

hai gul kā kyā haiñ is ke to Thikāne sau 'salil' sāhab

kabhī gar aañch aa.ī to chaman kā ḳhaar bolegā

hue jo qatl un ka hai wahi gham-KHwar bolega

maze ki baat hai qatil ki jai-jai-kar bolega

tabiat ho ki niyyat ho haqiqat hogi zahir hi

teri KHamoshiyon mein bhi tera kirdar bolega

sitam-gar ne jo karna tha kiya lekin sitam ye hai

mere dil ko yaqin tha ki koi gham-KHwar bolega

kahani zindagi ki ek dariya ki haqiqat hai

kinare kuchh nahin kahte magar majdhaar bolega

chhupae lakh tu is ko hai aisi raushni ye to

teri aankhon se chamkegi tera inkar bolega

nahin bolenge hum lekin hamari baat bolegi

jise hai bolne ki lat wahi har bar bolega

pata sab ko hai lachaari gharibi ka muqaddar hai

sawere dekhna kya kya magar aKHbar bolega

hai gul ka kya hain is ke to Thikane sau 'salil' sahab

kabhi gar aanch aai to chaman ka KHar bolega