hue the kaisi haqiqat se bad-guman hum log

hue the kaisī haqīqat se bad-gumāñ ham log

jo har-sū dekh rahe haiñ dhuāñ dhuāñ ham log

hamīñ se asl-e-binā-e-hayāt thī ab tak

magar haiñ chashm-e-ḳhudā.ī meñ rā.egāñ ham log

tamām hosh-o-ḳhirad ik gumān-e-lā-hāsil

ki soch sakte the varna kahāñ kahāñ ham log

hameñ thā zo'm ke goyā-e-‘asr haiñ lekin

ka.ī dinoñ se to jaise haiñ be-zabāñ ham log

vo sarfaroshī ke jazbe bhī raakh ho ga.e haiñ

hatheliyoñ pe liye ghūmte the jaañ ham log

magar ye vaqt bhī 'anjum' guzar hī jā.egā

palaT ke ā.eñge ik roz kāmrāñ ham log

hue the kaisi haqiqat se bad-guman hum log

jo har-su dekh rahe hain dhuan dhuan hum log

hamin se asl-e-bina-e-hayat thi ab tak

magar hain chashm-e-KHudai mein raegan hum log

tamam hosh-o-KHirad ek guman-e-la-hasil

ki soch sakte the warna kahan kahan hum log

hamein tha zo'm ke goya-e-‘asr hain lekin

kai dinon se to jaise hain be-zaban hum log

wo sarfaroshi ke jazbe bhi rakh ho gae hain

hatheliyon pe liye ghumte the jaan hum log

magar ye waqt bhi 'anjum' guzar hi jaega

palaT ke aaenge ek roz kaamran hum log