hui hai saya-fagan sabr ki qaba mujh par

huī hai sāya-fagan sabr kī qabā mujh par

chalā.e tiir kaho aa ke hur milā mujh par

khiñchā huā hai mire gird māmtā kā hisār

asar kahāñ se kare koī bad-duā mujh par

miTā sakī na mire paañv kī lakīreñ tak

hazār ret uḌātī rahī havā mujh par

mire vajūd se aage na thī koī manzil

udāsiyoñ kā safar ḳhatm ho gayā mujh par

usī ko saare zamāne ne mil ke baañT liyā

jo rah gayā thā guzarne se sānehā mujh par

mire badan pe riyā kā nahīñ koī dhabbā

bhalī kahāñ se lagegī tirī qabā mujh par

qubūl hotīñ agar pastiyāñ mujhe 'kāzim'

ye āsmān-e-masā.il na TūTtā mujh par

hui hai saya-fagan sabr ki qaba mujh par

chalae tir kaho aa ke hur mila mujh par

khincha hua hai mere gird mamta ka hisar

asar kahan se kare koi bad-dua mujh par

miTa saki na mere panw ki lakiren tak

hazar ret uDati rahi hawa mujh par

mere wajud se aage na thi koi manzil

udasiyon ka safar KHatm ho gaya mujh par

usi ko sare zamane ne mil ke banT liya

jo rah gaya tha guzarne se saneha mujh par

mere badan pe riya ka nahin koi dhabba

bhali kahan se lagegi teri qaba mujh par

qubul hotin agar pastiyan mujhe 'kazim'

ye aasman-e-masail na TuTta mujh par