hui muddat ki ghane peD se jhanka suraj

huī muddat ki ghane peḌ se jhāñkā sūraj

mere āñgan se ḳhafā ab bhī hai bāñkā sūraj

chāñd tāroñ pe nigāheñ thiiñ ki Tik jaatī thiiñ

surḳh āñchal meñ hayā-dār ne Tāñkā sūraj

jab kabhī chāñd mirī chhat pe utar aayā hai

parda-e-shab ne baḌe pyaar se Dhāñkā sūraj

so.e jañgal ke agar chand shajar jaag ga.e

ye huā hai ki havāoñ ne hai hāñkā sūraj

vaqt meñ qaid kiyā nuur likhā dev kahā

har zamāne ne ka.ī Dhañg se aañkā sūraj

taaz meñ vus.at-e-aflāk meñ bikhre na kahīñ

bārhā jauhar-e-zarrāt ko phāñkā sūraj

hui muddat ki ghane peD se jhanka suraj

mere aangan se KHafa ab bhi hai banka suraj

chand taron pe nigahen thin ki Tik jati thin

surKH aanchal mein haya-dar ne Tanka suraj

jab kabhi chand meri chhat pe utar aaya hai

parda-e-shab ne baDe pyar se Dhanka suraj

soe jangal ke agar chand shajar jag gae

ye hua hai ki hawaon ne hai hanka suraj

waqt mein qaid kiya nur likha dew kaha

har zamane ne kai Dhang se aanka suraj

taz mein wusat-e-aflak mein bikhre na kahin

barha jauhar-e-zarraat ko phanka suraj