hujum-e-dard mila imtihan aisa tha

hujūm-e-dard milā imtihān aisā thā

magar vo chup hī rahā be-zabān aisā thā

kisī kī izzat-o-nāmūs par na aañch aa.ī

luTā to uf bhī na kī mehrbān aisā thā

zamāna guzrā magar daaġh rah gayā dil par

na miT sakā kisī sūrat nishān aisā thā

badan kī shāḳh se us ke kiran jo lipTī thī

vo sah sakā na use dhān-pān aisā thā

matā-e-zīst luTā dī ga.ī magar us ne

zarā bhī qadr na kī bad-gumān aisā thā

nazar-shanās thā kaisā ki umr bhar 'anjum'

bhulā sakā na use mehmān aisā thā

hujum-e-dard mila imtihan aisa tha

magar wo chup hi raha be-zaban aisa tha

kisi ki izzat-o-namus par na aanch aai

luTa to uf bhi na ki mehrban aisa tha

zamana guzra magar dagh rah gaya dil par

na miT saka kisi surat nishan aisa tha

badan ki shaKH se us ke kiran jo lipTi thi

wo sah saka na use dhan-pan aisa tha

mata-e-zist luTa di gai magar us ne

zara bhi qadr na ki bad-guman aisa tha

nazar-shanas tha kaisa ki umr bhar 'anjum'

bhula saka na use mehman aisa tha