hujum-e-ham-nafsan chaara-e-alam na hua

hujūm-e-ham-nafsāñ chāra-e-alam na huā

ki is tarah ġham-e-tanhā-ravī to kam na huā

na pūchh dasht-e-talab meñ matā-e-dāman-e-zīst

ye taar taar to hotā rahā pa nam na huā

likhī ga.ī haiñ junūñ kī hikāyateñ kyā kyā

magar vo qissa-e-ġham jo kabhī raqam na huā

milī na ābla-pāyān-e-shauq ko manzil

ki fāsloñ kī tarah hausla bhī kam na huā

rah-e-talab meñ hai āsūda-hāl mauj-ba-jism

ḳhudā ḳhudā hī rahā aur sanam sanam na huā

vo kaun haiñ ki havas raas aa ga.ī hai jinheñ

yahāñ to 'ishq bhī chāra-gar-e-alam na huā

gumāñ huā mujhe ehsān-e-nā-shanāsī kā

jo ḳhud-baḳhud koī āmāda-e-sitam na huā

hujum-e-ham-nafsan chaara-e-alam na hua

ki is tarah gham-e-tanha-rawi to kam na hua

na puchh dasht-e-talab mein mata-e-daman-e-zist

ye tar tar to hota raha pa nam na hua

likhi gai hain junun ki hikayaten kya kya

magar wo qissa-e-gham jo kabhi raqam na hua

mili na aabla-payan-e-shauq ko manzil

ki faslon ki tarah hausla bhi kam na hua

rah-e-talab mein hai aasuda-haal mauj-ba-jism

KHuda KHuda hi raha aur sanam sanam na hua

wo kaun hain ki hawas ras aa gai hai jinhen

yahan to 'ishq bhi chaara-gar-e-alam na hua

guman hua mujhe ehsan-e-na-shanasi ka

jo KHud-baKHud koi aamada-e-sitam na hua