hujum-e-ranj se dil ko masarrat hoti jati hai

hujūm-e-rañj se dil ko masarrat hotī jaatī hai

ki mujh par aa.ina apnī haqīqat hotī jaatī hai

ye kis ta.amīr-e-nāqis kī bharī jaatī haiñ buniyādeñ

ki duniyā be-charāġh-e-ādmiyat hotī jaatī hai

vo be-parda harīm-e-shā.irī meñ aate jaate haiñ

murattab merī tārīḳh-e-mohabbat hotī jaatī hai

maiñ jitnā un ke asbāb-e-jafā par ġhaur kartā huuñ

mujhe apnī vafāoñ par nadāmat hotī jaatī hai

ba-īñ hālāt-e-māyūsī ba-īñ ausāf-e-mahrūmī

mohabbat hai ki muhtāj-e-mohabbat hotī jaatī hai

zabāñ sī leñ tire kahne se lekin is ko kyā kiije

shikāyat jab nahīñ hotī hikāyat hotī jaatī hai

hai merā ishq yak dar-gīr mohkam-gīr se baalā

mirī nazroñ meñ duniyā ḳhūbsūrat hotī jaatī hai

are tauba gunāhoñ ke siyah-ḳhvāboñ se bedārī

ki āñkheñ khultī jaatī haiñ nadāmat hotī jaatī hai

yūñhī tajdīd-e-paimān-e-vafā kiije mire ham-dam

baḌī āsān tashrīh-e-mohabbat hotī jaatī hai

mohabbat rafta rafta Dhal rahī hai vaza-dārī meñ

ye kis raftār se barpā qayāmat hotī jaatī hai

jise tasvīr kahnā kufr hai ā.īn-e-ulfat meñ

vahī tanvīr ma.abūd-e-mohabbat hotī jaatī hai

ma.āl-e-ranj-o-rāhat dekhtā jaatā hai dil jitnā

tamannā tamannā-e-ranj-o-rāhat hotī jaatī hai

na ho mere na tum mujh ko kisī kā hone dete ho

qayāmat kyā ye bālā-e-qayāmat hotī jaatī hai

beham-dillāh maiñ 'ehsān' is manzil pe aa pahuñchā

musībat jab nahīñ hotī musībat hotī jaatī hai

hujum-e-ranj se dil ko masarrat hoti jati hai

ki mujh par aaina apni haqiqat hoti jati hai

ye kis tamir-e-naqis ki bhari jati hain buniyaaden

ki duniya be-charagh-e-admiyat hoti jati hai

wo be-parda harim-e-shairi mein aate jate hain

murattab meri tariKH-e-mohabbat hoti jati hai

main jitna un ke asbab-e-jafa par ghaur karta hun

mujhe apni wafaon par nadamat hoti jati hai

ba-in haalat-e-mayusi ba-in ausaf-e-mahrumi

mohabbat hai ki muhtaj-e-mohabbat hoti jati hai

zaban si len tere kahne se lekin is ko kya kije

shikayat jab nahin hoti hikayat hoti jati hai

hai mera ishq yak dar-gir mohkam-gir se baala

meri nazron mein duniya KHubsurat hoti jati hai

are tauba gunahon ke siyah-KHwabon se bedari

ki aankhen khulti jati hain nadamat hoti jati hai

yunhi tajdid-e-paiman-e-wafa kije mere ham-dam

baDi aasan tashrih-e-mohabbat hoti jati hai

mohabbat rafta rafta Dhal rahi hai waza-dari mein

ye kis raftar se barpa qayamat hoti jati hai

jise taswir kahna kufr hai aain-e-ulfat mein

wahi tanwir mabud-e-mohabbat hoti jati hai

maal-e-ranj-o-rahat dekhta jata hai dil jitna

tamanna tamanna-e-ranj-o-rahat hoti jati hai

na ho mere na tum mujh ko kisi ka hone dete ho

qayamat kya ye baala-e-qayamat hoti jati hai

beham-dillah main 'ehsan' is manzil pe aa pahuncha

musibat jab nahin hoti musibat hoti jati hai