hujum-e-tamanna se lachaar hain hum

hujūm-e-tamannā se lāchār haiñ ham

fareb-e-jahāñ meñ giraftār haiñ ham

hamāre lahū se ye maqtal sajā hai

magar is kahānī meñ ik baar haiñ ham

dil-e-muztarib kī ḳhudārā suno kuchh

nigāh-e-sitam meñ kahāñ yaar haiñ ham

hamārī ragoñ meñ hai ḳhuuñ inqilābī

shab-e-zulm ke aage dīvār haiñ ham

na ā.eñge ham dastaras meñ tumhārī

zamīñ āsmāñ se bahut paar haiñ ham

hamāre hai dam se charāġhāñ jahāñ meñ

ḳhudā kī ḳhudā.ī kā shahkār haiñ ham

kisī hausle kī zarūrat nahīñ hai

agarche hazīmat se do-chār haiñ ham

numūd-e-sahar kī hai ummīd ham se

silā-e-suḳhan ke bhī sālār haiñ ham

rahegā hamārā sadā naam 'ambar'

suno zindagī ke vo āsār haiñ ham

hujum-e-tamanna se lachaar hain hum

fareb-e-jahan mein giraftar hain hum

hamare lahu se ye maqtal saja hai

magar is kahani mein ek bar hain hum

dil-e-muztarib ki KHudara suno kuchh

nigah-e-sitam mein kahan yar hain hum

hamari ragon mein hai KHun inqilabi

shab-e-zulm ke aage diwar hain hum

na aaenge hum dastaras mein tumhaari

zamin aasman se bahut par hain hum

hamare hai dam se charaghan jahan mein

KHuda ki KHudai ka shahkar hain hum

kisi hausle ki zarurat nahin hai

agarche hazimat se do-chaar hain hum

numud-e-sahar ki hai ummid hum se

sila-e-suKHan ke bhi salar hain hum

rahega hamara sada nam 'ambar'

suno zindagi ke wo aasar hain hum