hukumat jashn ka bais nahin hai zimmedari hai

hukūmat jashn kā bā'is nahīñ hai zimmedārī hai

ye manzil ḳhud-numā.ī kī nahīñ hai ḳhāksārī hai

chalo ham ye nahīñ kahte ki sab kī sab hamārī hai

magar apnī bhī is duniyā meñ thoḌī hisse-dārī hai

koī naukar nahīñ rakkhā koī chākar nahīñ rakkhā

ki ham ne ḳhud hī apnī jhoñpḌī jhāḌī buhārī hai

kisī bhī bhakt ko mushkil hai koī baat samjhānā

usī ko māntā hai devtā jis kā pujārī hai

kalī chūmī kisī ne aur kisī ne phuul ko chūmā

na har bhañvrā kuñvārā hai na har titlī kuñvārī hai

hameñ hindostānī desh meñ koī nahīñ kahtā

koī kahtā hai u.p kā koī kahtā bihārī hai

hukumat jashn ka ba'is nahin hai zimmedari hai

ye manzil KHud-numai ki nahin hai KHaksari hai

chalo hum ye nahin kahte ki sab ki sab hamari hai

magar apni bhi is duniya mein thoDi hisse-dari hai

koi naukar nahin rakkha koi chaakar nahin rakkha

ki hum ne KHud hi apni jhonpDi jhaDi buhaari hai

kisi bhi bhakt ko mushkil hai koi baat samjhana

usi ko manta hai dewta jis ka pujari hai

kali chumi kisi ne aur kisi ne phul ko chuma

na har bhanwra kunwara hai na har titli kunwari hai

hamein hindostani desh mein koi nahin kahta

koi kahta hai up ka koi kahta bihaari hai