hunar diya bhi nahin le liya anguTha bhi

hunar diyā bhī nahīñ le liyā añgūThā bhī

baḌe kamāl kī fankār hai ye duniyā bhī

hazār ālam-e-hairat karūñ nisār us par

nazar to aa.e koī chehra ā.īna sā bhī

maiñ apnī raah kī dīvār ḳhud banātā huuñ

mirā vajūd mujhe iiñT bhī hai gaarā bhī

bulā rahā huuñ sabhī ko ki mere saath aa.eñ

na aayā koī to maiñ chal paḌūñgā tanhā bhī

mirā zamīr mujhe ye yaqīñ dilātā hai

ki thā zavāl meñ thoḌā qusūr merā bhī

kisī kā saath koī umr bhar nahīñ detā

girāñ-bahā hai rifāqat kā ek lamha bhī

hunar diya bhi nahin le liya anguTha bhi

baDe kamal ki fankar hai ye duniya bhi

hazar aalam-e-hairat karun nisar us par

nazar to aae koi chehra aaina sa bhi

main apni rah ki diwar KHud banata hun

mera wajud mujhe inT bhi hai gara bhi

bula raha hun sabhi ko ki mere sath aaen

na aaya koi to main chal paDunga tanha bhi

mera zamir mujhe ye yaqin dilata hai

ki tha zawal mein thoDa qusur mera bhi

kisi ka sath koi umr bhar nahin deta

giran-baha hai rifaqat ka ek lamha bhi