husn-e-fani par hum apna dil fida karte rahe

husn-e-fānī par ham apnā dil fidā karte rahe

ab pashemāñ haiñ ki saarī umr kyā karte haiñ

ham samajhte haiñ janāb-e-shaiḳh kyā karte rahe

hūr-o-ġhilmāñ ke liye yād-e-ḳhudā karte rahe

zabt-e-girya zabt-e-nāla zabt-e-faryād-o-fuġhāñ

ishq meñ jo kuchh bhī ham se ho sakā karte rahe

kis tarah so.e paḌe haiñ chain se zer-e-mazār

jo zamīñ par har ghaḌī mahshar bapā karte rahe

sach agar pūchho to ham kāfir bhī haiñ momin bhī haiñ

but-kada meñ baiTh kar yād-e-ḳhudā karte rahe

maut hī āḳhir ilāj-e-kārgar sābit huī

dard-e-dil baḌhtā rahā juuñ juuñ davā karte rahe

ahl-e-himmat ne to ai 'sīmāb' manzil maar lī

ham magar hirmāñ-nasībī kā gilā karte rahe

husn-e-fani par hum apna dil fida karte rahe

ab pasheman hain ki sari umr kya karte hain

hum samajhte hain janab-e-shaiKH kya karte rahe

hur-o-ghilman ke liye yaad-e-KHuda karte rahe

zabt-e-girya zabt-e-nala zabt-e-faryaad-o-fughan

ishq mein jo kuchh bhi hum se ho saka karte rahe

kis tarah soe paDe hain chain se zer-e-mazar

jo zamin par har ghaDi mahshar bapa karte rahe

sach agar puchho to hum kafir bhi hain momin bhi hain

but-kada mein baiTh kar yaad-e-KHuda karte rahe

maut hi aaKHir ilaj-e-kargar sabit hui

dard-e-dil baDhta raha jun jun dawa karte rahe

ahl-e-himmat ne to ai 'simab' manzil mar li

hum magar hirman-nasibi ka gila karte rahe