husn-e-jaanan ki qayamat hai uThae rakhe

husn-e-jānāñ ki qayāmat hai uThā.e rakhe

shahr ke shahr ko dīvāna banā.e rakhe

ek vo shaḳhs yahāñ thā to baḌī raunaq thī

kaun is shahr meñ ab sham'eñ jalā.e rakhe

dil pareshāñ thā magar jaan tumhārī ḳhātir

chehra shādāb rakhā baal banā.e rakhe

hijr meñ haal se behāl hue haiñ ḳhud hī

kis meñ himmat hai ki kamre ko sajā.e rakhe

dil-e-nādāñ ko ajab kaam diyā qudrat ne

ḳhāna-e-jāñ meñ sadā shor machā.e rakhe

vo jo ojhal hai nigāhoñ se magar dil meñ hai

gar vo chāhe to mirī baat banā.e rakhe

sheva-e-husn to inkār hī Thahrā 'nāsir'

'ishq ko chāhiye ummīd lagā.e rakhe

husn-e-jaanan ki qayamat hai uThae rakhe

shahr ke shahr ko diwana banae rakhe

ek wo shaKHs yahan tha to baDi raunaq thi

kaun is shahr mein ab sham'en jalae rakhe

dil pareshan tha magar jaan tumhaari KHatir

chehra shadab rakha baal banae rakhe

hijr mein haal se behaal hue hain KHud hi

kis mein himmat hai ki kamre ko sajae rakhe

dil-e-nadan ko ajab kaam diya qudrat ne

KHana-e-jaan mein sada shor machae rakhe

wo jo ojhal hai nigahon se magar dil mein hai

gar wo chahe to meri baat banae rakhe

shewa-e-husn to inkar hi Thahra 'nasir'

'ishq ko chahiye ummid lagae rakhe