husn-e-masum agar raaz-e-nihan tak pahunche

husn-e-ma.asūm agar rāz-e-nihāñ tak pahuñche

ġham kā me.aar ḳhudā jaane kahāñ tak pahuñche

ishq meñ yuuñ to sabhī sūd-o-ziyāñ tak pahuñche

kam haiñ aise jo mire azm-e-javāñ tak pahuñche

ham pahuñchne ko to har vahm-o-gumāñ tak pahuñche

tum vahāñ ho ki nazar bhī na jahāñ tak pahuñche

vo musībat jise duniyā ġham-e-dil kahtī hai

maiñ na rokūñ to ḳhudā jaane kahāñ tak pahuñche

tum kahīñ jā ke chhupo da.avat-e-nazzāra to do

phir ye maqdūr-e-nazar hai ki jahāñ tak pahuñche

hukm hai chāhe gulistāñ kā gulistāñ jal jaa.e

haath lekin na koī barq-e-tapāñ tak pahuñche

tum rah-e-ishq meñ lillāh mirā saath na do

silsila ġham kā ḳhudā jaane kahāñ tak pahuñche

uf vo nazreñ jo mohabbat kā bharam rakh na sakeñ

haa.e vo kaif jo ehsās-e-garāñ tak pahuñche

rāz-e-ulfat maiñ chhupātā to huuñ lekin 'arshad'

Dar hai ehsās kī talḳhī na zabāñ tak pahuñche

husn-e-masum agar raaz-e-nihan tak pahunche

gham ka mear KHuda jaane kahan tak pahunche

ishq mein yun to sabhi sud-o-ziyan tak pahunche

kam hain aise jo mere azm-e-jawan tak pahunche

hum pahunchne ko to har wahm-o-guman tak pahunche

tum wahan ho ki nazar bhi na jahan tak pahunche

wo musibat jise duniya gham-e-dil kahti hai

main na rokun to KHuda jaane kahan tak pahunche

tum kahin ja ke chhupo dawat-e-nazzara to do

phir ye maqdur-e-nazar hai ki jahan tak pahunche

hukm hai chahe gulistan ka gulistan jal jae

hath lekin na koi barq-e-tapan tak pahunche

tum rah-e-ishq mein lillah mera sath na do

silsila gham ka KHuda jaane kahan tak pahunche

uf wo nazren jo mohabbat ka bharam rakh na saken

hae wo kaif jo ehsas-e-garan tak pahunche

raaz-e-ulfat main chhupata to hun lekin 'arshad'

Dar hai ehsas ki talKHi na zaban tak pahunche