hawas-o-hosh ka ye khel bhi zaruri hai

havās-o-hosh kā ye khel bhī zarūrī hai

par apnī āḳhirī manzil to lā-shu'ūrī hai

'ajab nahīñ ki ham ab ke bhī tai na kar paa.eñ

hamāre biich meñ jo haath bhar kī duurī hai

kisī maqām tak is ko vo aa ke le jaa.e

jise bhī lagtā hai ye dāstāñ adhūrī hai

amīr-e-shahr kī haamī na bharne vaalo suno

ḳhamosh rahnā tumhārā bhī jī-huzūrī hai

udaas log samajhte nahīñ haiñ kyoñ ye baat

udaas logoñ kā honā bahut zarūrī hai

hawas-o-hosh ka ye khel bhi zaruri hai

par apni aaKHiri manzil to la-shu'uri hai

'ajab nahin ki hum ab ke bhi tai na kar paen

hamare bich mein jo hath bhar ki duri hai

kisi maqam tak is ko wo aa ke le jae

jise bhi lagta hai ye dastan adhuri hai

amir-e-shahr ki hami na bharne walo suno

KHamosh rahna tumhaara bhi ji-huzuri hai

udas log samajhte nahin hain kyon ye baat

udas logon ka hona bahut zaruri hai