husn kaisa ishq bhi ruswa hua

husn kaisā ishq bhī rusvā huā

yuuñ taqāzā-e-junūñ puurā huā

kam-nigāhī kā tirī shikva nahīñ

apnī āñkheñ khul ga.iiñ achchhā huā

ruuh yuuñ niklī tire bīmār kī

jaise bujh jaa.e diyā jaltā huā

rakh liyā muusā ne jalvoñ kā bharam

hosh kho baiThe bahut achchhā huā

sāġhar-e-jam se to naḳhvat baḌh ga.ī

sāqiyā jām-e-sifālīñ kyā huā

ham ba-qadr-e-zarf pī kar jab uThe

daur-e-mai bhī ruk gayā chaltā huā

ḳhār-hā-e-dasht hī se pūchh lo

hashr jo kuchh ābla-pā kā huā

bahr-e-ġham kī nazr lākhoñ ho ga.e

aaj tak ubhrā koī Duubā huā

ab 'riyāzī' lutf-e-mai-noshī kahāñ

hai nizām-e-maikada badlā huā

husn kaisa ishq bhi ruswa hua

yun taqaza-e-junun pura hua

kam-nigahi ka teri shikwa nahin

apni aankhen khul gain achchha hua

ruh yun nikli tere bimar ki

jaise bujh jae diya jalta hua

rakh liya musa ne jalwon ka bharam

hosh kho baiThe bahut achchha hua

saghar-e-jam se to naKHwat baDh gai

saqiya jam-e-sifalin kya hua

hum ba-qadr-e-zarf pi kar jab uThe

daur-e-mai bhi ruk gaya chalta hua

KHar-ha-e-dasht hi se puchh lo

hashr jo kuchh aabla-pa ka hua

bahr-e-gham ki nazr lakhon ho gae

aaj tak ubhra koi Duba hua

ab 'riyazi' lutf-e-mai-noshi kahan

hai nizam-e-maikada badla hua