husn ke raaz-e-nihan sharh-e-bayan tak pahunche

husn ke rāz-e-nihāñ sharh-e-bayāñ tak pahuñche

aañkh se dil meñ ga.e dil se zabāñ tak pahuñche

dil ne āñkhoñ se kahī āñkhoñ ne dil sī kah dī

baat chal niklī hai ab dekheñ kahāñ tak pahuñche

ishq pahle hī qadam par hai yaqīñ se vāsil

intihā aql kī ye hai ki gumāñ tak pahuñche

ka.aba-o-dair meñ to log haiñ āte-jāte

vo na lauTe jo dar-e-pīr-e-muġhāñ tak pahuñche

aañkh se aañkh kahe dil se hoñ dil kī bāteñ

vaa.e vo arz-e-tamannā jo zabāñ tak pahuñche

husn ke raaz-e-nihan sharh-e-bayan tak pahunche

aankh se dil mein gae dil se zaban tak pahunche

dil ne aankhon se kahi aankhon ne dil si kah di

baat chal nikli hai ab dekhen kahan tak pahunche

ishq pahle hi qadam par hai yaqin se wasil

intiha aql ki ye hai ki guman tak pahunche

kaba-o-dair mein to log hain aate-jate

wo na lauTe jo dar-e-pir-e-mughan tak pahunche

aankh se aankh kahe dil se hon dil ki baaten

wae wo arz-e-tamanna jo zaban tak pahunche