husn ki kam na hui garmi-e-bazar hanuz

husn kī kam na huī garmī-e-bāzār hanūz

naqd-e-jān tak liye phirte haiñ ḳharīdār hanūz

apnī iisā nafasī key bhī to kuchh sharm karo

chashm-e-bīmār ke bīmār haiñ bīmār hanūz

tā.ir-e-jāñ qafas-e-tan se to chhūTā lekin

dām-e-gesū meñ kisī ke hai giraftār hanūz

ham bhī the roz-e-azal sohbatī-e-bazm-e-alast

bhūltī hī nahīñ vo lazzat-e-guftār hanūz

saath chhoḌā safar-e-mulk-e-adam meñ sab ne

lipTī jaatī hai magar hasrat-e-dīdār hanūz

kyā ḳharābātiyoñ ko hazrat aasī na mile

ke salāmat hai vahī jubba-o-dastār hunūz

husn ki kam na hui garmi-e-bazar hanuz

naqd-e-jaan tak liye phirte hain KHaridar hanuz

apni isa nafasi key bhi to kuchh sharm karo

chashm-e-bimar ke bimar hain bimar hanuz

tair-e-jaan qafas-e-tan se to chhuTa lekin

dam-e-gesu mein kisi ke hai giraftar hanuz

hum bhi the roz-e-azal sohbati-e-bazm-e-alast

bhulti hi nahin wo lazzat-e-guftar hanuz

sath chhoDa safar-e-mulk-e-adam mein sab ne

lipTi jati hai magar hasrat-e-didar hanuz

kya KHarabaatiyon ko hazrat aasi na mile

ke salamat hai wahi jubba-o-dastar hunuz