husn mein naz-o-ada ishq mein wahshat kaisi

husn meñ nāz-o-adā ishq meñ vahshat kaisī

is zamāne meñ vafā kaisī mohabbat kaisī

talḳh bātoñ pe ḳhamoshī bhī baḌā azm hai par

gāliyāñ sun ke duā de vo sharāfat kaisī

log ġhālīchoñ pe sajde se bhī katrāte haiñ

teġh ke saa.e meñ karte the ibādat kaisī

ahd-e-ḳhush-hālī kā matlab hī liyā ayyāshī

ab agar TuuT ga.e ho to shikāyat kaisī

koī bolā hai ki shādāñ hai kisī kā ho kar

ho mujhe rañj vo ḳhush hai to mohabbat kaisī

umr bhar tifl-e-tabī.at ko sharārat sūjhī

vaqt-e-āḳhir ye jagī ḳhvāhish-e-jannat kaisī

maskan-e-amn-o-amāñ thā ye vatan 'nazr' mirā

aaj barpā hai har ik samt qayāmat kaisī

husn mein naz-o-ada ishq mein wahshat kaisi

is zamane mein wafa kaisi mohabbat kaisi

talKH baaton pe KHamoshi bhi baDa azm hai par

galiyan sun ke dua de wo sharafat kaisi

log ghaalichon pe sajde se bhi katraate hain

tegh ke sae mein karte the ibaadat kaisi

ahd-e-KHush-haali ka matlab hi liya ayyashi

ab agar TuT gae ho to shikayat kaisi

koi bola hai ki shadan hai kisi ka ho kar

ho mujhe ranj wo KHush hai to mohabbat kaisi

umr bhar tifl-e-tabiat ko shararat sujhi

waqt-e-aKHir ye jagi KHwahish-e-jannat kaisi

maskan-e-amn-o-aman tha ye watan 'nazr' mera

aaj barpa hai har ek samt qayamat kaisi