hun jab se tere halqa-e-faizan-e-nazar mein

huuñ jab se tire halqa-e-faizān-e-nazar meñ

duniyā simaT aa.ī hai mire dīda-e-tar meñ

hai qulzum-e-idrāk kī maujoñ meñ talātum

ab chain mayassar hai safar meñ na hazar meñ

kartā hai koī hurmat-e-ka.aba kī qabā chaak

ik sāhir-e-almūt ke jaadū ke asar meñ

ai gumbad-e-ḳhazrā ke makīñ vaqt-e-duā hai

ka.abe ke musalle haiñ kalīsā ke asar meñ

ai mīr-e-arab shaukat-o-satvat kī Dhalī shaam

har lamha safar barq-o-sharar ḳhauf-o-ḳhatar meñ

girdāb kī maujoñ se sadaf hote haiñ sairāb

kuchh ḳhair ke pahlū bhī huā karte haiñ shar meñ

rakh shīsha-e-dil gard-e-kudūrat se musaffā

miTTī kahīñ rakhtā hai koī kāñch ke ghar meñ

is sham.a kī duniyā ko zarūrat hai bahut aaj

jo shaiḳh liye baiThā hai allāh ke ghar meñ

'bazmī' tan-e-ḳhākī kā taqaddus nahīñ matlūb

hai azmat-e-gauhar kī binā āb-e-guhar meñ

hun jab se tere halqa-e-faizan-e-nazar mein

duniya simaT aai hai mere dida-e-tar mein

hai qulzum-e-idrak ki maujon mein talatum

ab chain mayassar hai safar mein na hazar mein

karta hai koi hurmat-e-kaba ki qaba chaak

ek sahir-e-almut ke jadu ke asar mein

ai gumbad-e-KHazra ke makin waqt-e-dua hai

kabe ke musalle hain kalisa ke asar mein

ai mir-e-arab shaukat-o-satwat ki Dhali sham

har lamha safar barq-o-sharar KHauf-o-KHatar mein

girdab ki maujon se sadaf hote hain sairab

kuchh KHair ke pahlu bhi hua karte hain shar mein

rakh shisha-e-dil gard-e-kudurat se musaffa

miTTi kahin rakhta hai koi kanch ke ghar mein

is shama ki duniya ko zarurat hai bahut aaj

jo shaiKH liye baiTha hai allah ke ghar mein

'bazmi' tan-e-KHaki ka taqaddus nahin matlub

hai azmat-e-gauhar ki bina aab-e-guhar mein