hun zat-e-fana mujhko fana kaun karega

huuñ zāt-e-fanā mujh ko fanā kaun karegā

qatre ko samundar se judā kaun karegā

tū rahmat-e-ālam hai shahanshāh-e-madīna

ummat pe karam tere sivā kaun karegā

lenā hai to le le abhī jannat kī duā.eñ

gar maañ na rahegī to duā kaun karegā

is daur meñ miltā nahīñ shīsha-gar-e-pur-fan

phir sher parakhne kī ḳhatā kaun karegā

ghar merā jalānā hai to dāman na bachānā

bhaḌke hue sho.aloñ pe havā kaun karegā

tū dard mohabbat kā mujhe de to rahā hai

ye bhī to batā is kī davā kaun karegā

'jāved' mirī jaan ke dushman haiñ mire dost

ab tū hī batā merā bhalā kaun karegā

hun zat-e-fana mujh ko fana kaun karega

qatre ko samundar se juda kaun karega

tu rahmat-e-alam hai shahanshah-e-madina

ummat pe karam tere siwa kaun karega

lena hai to le le abhi jannat ki duaen

gar man na rahegi to dua kaun karega

is daur mein milta nahin shisha-gar-e-pur-fan

phir sher parakhne ki KHata kaun karega

ghar mera jalana hai to daman na bachana

bhaDke hue shoalon pe hawa kaun karega

tu dard mohabbat ka mujhe de to raha hai

ye bhi to bata is ki dawa kaun karega

'jawed' meri jaan ke dushman hain mere dost

ab tu hi bata mera bhala kaun karega