hur ho ya koi pari ho tum

huur ho yā koī parī ho tum

kaise dil meñ utar ga.ī ho tum

terī āñkhoñ meñ niile dariyā haiñ

mere ḳhvāboñ kī jal-parī ho tum

zindagī bhī to aarzī Thahrī

kaise kah duuñ ki zindagī ho tum

tum mirī nazm ho taḳhayyul ho

merī urdu ho shā.irī ho tum

dekh jugnū bhī tum se jalte haiñ

chāñd-nagrī kī chāñdnī ho tum

ā.ina-ḳhāna ban ga.ī āñkheñ

sāmne hū-ba-hū khaḌī ho tum

mujh se goyā.ī chhin ga.ī merī

jab se patthar kī ban ga.ī ho tum

āḳhirī baar dekh luuñ tum ko

kyā palaT kar bhī dekhtī ho tum

aaj dil ne tumheñ bahut DhūñDā

aise lagtā hai jā chukī ho tum

hur ho ya koi pari ho tum

kaise dil mein utar gai ho tum

teri aankhon mein nile dariya hain

mere KHwabon ki jal-pari ho tum

zindagi bhi to aarzi Thahri

kaise kah dun ki zindagi ho tum

tum meri nazm ho taKHayyul ho

meri urdu ho shairi ho tum

dekh jugnu bhi tum se jalte hain

chand-nagri ki chandni ho tum

aaina-KHana ban gai aankhen

samne hu-ba-hu khaDi ho tum

mujh se goyai chhin gai meri

jab se patthar ki ban gai ho tum

aaKHiri bar dekh lun tum ko

kya palaT kar bhi dekhti ho tum

aaj dil ne tumhein bahut DhunDa

aise lagta hai ja chuki ho tum