ibaadaton ko meri ratjaga samajhta hai

ibādatoñ ko mirī ratjagā samajhtā hai

vo sachche pyaar ko bhī falsafa samajhtā hai

maiñ us ko dil se ġhazal kī radīf māntī huuñ

mujhe vo sher kā ik qāfiya samajhtā hai

tumheñ to sirf ye ḳhvāhish ki raat raushan ho

hai karb jalne kā ye bas diyā samajhtā hai

maiñ apne ġham ko chhupā kar jo thoḌā hañstī huuñ

vo nā-samajh ise merī adā samajhtā hai

hamārī ruuh pe mahke haiñ phuul zaḳhmoñ ke

zamānā jin ko guloñ kī qabā samajhtā hai

dikhā.ī dete haiñ sanjīdgī ke naqsh-o-nigār

hamārī shoḳhiyāñ kab aa.ina samajhtā hai

qadam qadam pe bichhātā hai Thokareñ 'sīmā'

thakān paañv kī kab rāsta samajhtā hai

ibaadaton ko meri ratjaga samajhta hai

wo sachche pyar ko bhi falsafa samajhta hai

main us ko dil se ghazal ki radif manti hun

mujhe wo sher ka ek qafiya samajhta hai

tumhein to sirf ye KHwahish ki raat raushan ho

hai karb jalne ka ye bas diya samajhta hai

main apne gham ko chhupa kar jo thoDa hansti hun

wo na-samajh ise meri ada samajhta hai

hamari ruh pe mahke hain phul zaKHmon ke

zamana jin ko gulon ki qaba samajhta hai

dikhai dete hain sanjidgi ke naqsh-o-nigar

hamari shoKHiyan kab aaina samajhta hai

qadam qadam pe bichhata hai Thokaren 'sima'

thakan panw ki kab rasta samajhta hai