ibraton ke har ek bayan mein hun

ibratoñ ke har ik bayān meñ huuñ

dard kī saarī dāstān meñ huuñ

har qadam gardisheñ haiñ terā nasīb

maiñ bhī har saañs imtihān meñ huuñ

ḳhud nishāna huuñ aur shikār bhī ḳhud

tiir huuñ aur abhī kamān meñ huuñ

merā hāfiz baḌā muhāfiz hai

hazrat-e-ishq kī amaan meñ huuñ

vo ḳharāba jo tū ne chhoḌ diyā

maiñ abhī tak usī makān meñ huuñ

sab farishte haiñ mere chāroñ taraf

maiñ zamīñ par yā āsmān meñ huuñ

merā azm-e-safar salāmat hai

dhuup meñ huuñ ki sā.ebān meñ huuñ

sarhadeñ chhū ke lauT aatā huuñ

haq-o-bātil ke darmiyān meñ huuñ

dushmanoñ ke had-e-yaqīn se duur

dostoñ ke har ik gumān meñ huuñ

harf-e-haq terī justujū ban kar

maiñ savāloñ ke har nishān meñ huuñ

kal talak thā sarāpā zabt-o-sukūt

aaj har ek kī zabān meñ huuñ

chand ḳhush-nām hāfizoñ ke sivā

maiñ saf-e-yād-e-raftagān meñ huuñ

ibraton ke har ek bayan mein hun

dard ki sari dastan mein hun

har qadam gardishen hain tera nasib

main bhi har sans imtihan mein hun

KHud nishana hun aur shikar bhi KHud

tir hun aur abhi kaman mein hun

mera hafiz baDa muhafiz hai

hazrat-e-ishq ki aman mein hun

wo KHaraba jo tu ne chhoD diya

main abhi tak usi makan mein hun

sab farishte hain mere chaaron taraf

main zamin par ya aasman mein hun

mera azm-e-safar salamat hai

dhup mein hun ki saeban mein hun

sarhaden chhu ke lauT aata hun

haq-o-baatil ke darmiyan mein hun

dushmanon ke had-e-yaqin se dur

doston ke har ek guman mein hun

harf-e-haq teri justuju ban kar

main sawalon ke har nishan mein hun

kal talak tha sarapa zabt-o-sukut

aaj har ek ki zaban mein hun

chand KHush-nam hafizon ke siwa

main saf-e-yaad-e-raftagan mein hun