idhar dariya mein ek tufan khaDa tha

idhar dariyā meñ ik tūfāñ khaḌā thā

udhar sohnī thī aur kachchā ghaḌā thā

hameñ hadd-e-adab ne maar Daalā

ki dushman umr meñ ham se baḌā thā

vo jin ke ghar ko bārish le ga.ī thī

unheñ sāvan bahut mahñgā paḌā thā

añdherī shaam raushan ho ga.ī thī

ufuq kī aañkh meñ hiirā jaḌā thā

vo hañste hañste ruḳhsat ho rahe the

hamārā imtihāñ thā aur kaḌā thā

ilāqa thā hamārā aur us meñ

tumhāre naam kā jhanDā gaḌā thā

kahīñ phūloñ se pagDanDī sajī thī

kahīñ ik rāsta suunā paḌā thā

lipaT kar ro diye ham us shajar se

ki jis kā āḳhirī pattā jhaḌā thā

idhar dariya mein ek tufan khaDa tha

udhar sohni thi aur kachcha ghaDa tha

hamein hadd-e-adab ne mar Dala

ki dushman umr mein hum se baDa tha

wo jin ke ghar ko barish le gai thi

unhen sawan bahut mahnga paDa tha

andheri sham raushan ho gai thi

ufuq ki aankh mein hira jaDa tha

wo hanste hanste ruKHsat ho rahe the

hamara imtihan tha aur kaDa tha

ilaqa tha hamara aur us mein

tumhaare nam ka jhanDa gaDa tha

kahin phulon se pagDanDi saji thi

kahin ek rasta suna paDa tha

lipaT kar ro diye hum us shajar se

ki jis ka aaKHiri patta jhaDa tha