iman ke bharose par dariya mein utar jaana

īmāñ ke bharose par dariyā meñ utar jaanā

tū bahr-e-havādis se yak-laḳht ubhar jaanā

jis raah pe phailā ho nafrat kā añdherā tum

ulfat kī ziyā le kar us rah se guzar jaanā

ghar mere chale aa.e vo ḳhud hī achānak se

kahte haiñ isī ko to qismat kā sañvar jaanā

shā.ir meñ nahīñ lekin sohbat kā asar hai ye

jab sher huā koī faizān-e-nazar jaanā

maiḳhāne se pī kar bhī lauTā hai salīqe se

ma.alūm thā us ko ab jaanā hai to ghar jaanā

ham sach ko kaheñge sach fitrat ye hamārī hai

zālim se hameñ hargiz aatā nahīñ Dar jaanā

abbā kī nasīhat par kartā huuñ amal har dam

us ek amal se hī sīkhā hai nikhar jaanā

masrūf agar ho tum be-kār nahīñ maiñ bhī

is ġham se to behtar hai āvāra hī mar jaanā

barsāt kā ḳhadsha hai bijlī na kahīñ gir jaa.e

jaate ho kahāñ 'ahmad' kuchh der Thahar jaanā

iman ke bharose par dariya mein utar jaana

tu bahr-e-hawadis se yak-laKHt ubhar jaana

jis rah pe phaila ho nafrat ka andhera tum

ulfat ki ziya le kar us rah se guzar jaana

ghar mere chale aae wo KHud hi achanak se

kahte hain isi ko to qismat ka sanwar jaana

shair mein nahin lekin sohbat ka asar hai ye

jab sher hua koi faizan-e-nazar jaana

maiKHane se pi kar bhi lauTa hai saliqe se

malum tha us ko ab jaana hai to ghar jaana

hum sach ko kahenge sach fitrat ye hamari hai

zalim se hamein hargiz aata nahin Dar jaana

abba ki nasihat par karta hun amal har dam

us ek amal se hi sikha hai nikhar jaana

masruf agar ho tum be-kar nahin main bhi

is gham se to behtar hai aawara hi mar jaana

barsat ka KHadsha hai bijli na kahin gir jae

jate ho kahan 'ahmad' kuchh der Thahar jaana