iman ke sath KHami-e-iman bhi chahiye

īmāñ ke saath ḳhāmi-e-īmāñ bhī chāhiye

azm-e-safar kiyā hai to sāmāñ bhī chāhiye

kuchh asl to khule kahīñ is zor-o-shor kī

dariyā ke rāste meñ bayābāñ bhī chāhiye

bhaḌkā to hai badan meñ lahū kā gulāb sā

mushkil hai ye ki tañgī-e-dāmāñ bhī chāhiye

us ke na.ī qamīs ke tohfe kā shukriya

lekin yahāñ to pairahan-e-jāñ bhī chāhiye

is tīrgī meñ partav-e-mahtāb-e-ruḳh ke saath

kuchh aks-e-āftāb-e-garebāñ bhī chāhiye

mushkil-pasand hī sahī maiñ vasl meñ magar

ab ke ye marhala mujhe āsāñ bhī chāhiye

kuchh us taraf bhī josh-e-jafā hai nayā nayā

kuchh zulm apnī shaan ke shāyāñ bhī chāhiye

Darte bhī rahiye us se ki is meñ bhī hai mazā

lekin kabhī kabhī zarā shūñ-shāñ bhī chāhiye

mashshātagi-e-ma.anā bahut ho chukī 'zafar'

kuchh roz ab ye zulf pareshāñ bhī chāhiye

iman ke sath KHami-e-iman bhi chahiye

azm-e-safar kiya hai to saman bhi chahiye

kuchh asl to khule kahin is zor-o-shor ki

dariya ke raste mein bayaban bhi chahiye

bhaDka to hai badan mein lahu ka gulab sa

mushkil hai ye ki tangi-e-daman bhi chahiye

us ke nai qamis ke tohfe ka shukriya

lekin yahan to pairahan-e-jaan bhi chahiye

is tirgi mein partaw-e-mahtab-e-ruKH ke sath

kuchh aks-e-aftab-e-gareban bhi chahiye

mushkil-pasand hi sahi main wasl mein magar

ab ke ye marhala mujhe aasan bhi chahiye

kuchh us taraf bhi josh-e-jafa hai naya naya

kuchh zulm apni shan ke shayan bhi chahiye

Darte bhi rahiye us se ki is mein bhi hai maza

lekin kabhi kabhi zara shun-shan bhi chahiye

mashshatagi-e-mana bahut ho chuki 'zafar'

kuchh roz ab ye zulf pareshan bhi chahiye