ijz-e-KHak-sari kyun faKHr-e-kaj-kulahi kya

ijz-e-ḳhāk-sārī kyuuñ faḳhr-e-kaj-kulāhī kyā

jab mohabbateñ kī haiñ phir koī gavāhī kyā

ham rutoñ ke mujrim haiñ har havā kī nazroñ meñ

terī pārsā.ī kyā merī be-gunāhī kyā

tum to aañkh vaale the aks mil gayā hogā

maiñ sadā kā be-chehra merā ā.īna hī kyā

vasl kā koī lamha rā.egāñ nahīñ lekin

jo alag na kartā ho aisā rāsta hī kyā

shab-gazīda logoñ ko niiñd se ulajhnā hai

raat kī masāfat meñ razm-e-sub.h-gāhī kyā

jaane kab bigaḌ jaa.eñ jaane kab sañvar jaa.eñ

dast-e-kūza-gar meñ haiñ apnā aasrā hī kyā

tum 'salīm' shā.ir ho shohratoñ pe mat jaao

masnad-e-faqīrī pe ḳhabt-e-bādshāhī kyā

ijz-e-KHak-sari kyun faKHr-e-kaj-kulahi kya

jab mohabbaten ki hain phir koi gawahi kya

hum ruton ke mujrim hain har hawa ki nazron mein

teri parsai kya meri be-gunahi kya

tum to aankh wale the aks mil gaya hoga

main sada ka be-chehra mera aaina hi kya

wasl ka koi lamha raegan nahin lekin

jo alag na karta ho aisa rasta hi kya

shab-gazida logon ko nind se ulajhna hai

raat ki masafat mein razm-e-subh-gahi kya

jaane kab bigaD jaen jaane kab sanwar jaen

dast-e-kuza-gar mein hain apna aasra hi kya

tum 'salim' shair ho shohraton pe mat jao

masnad-e-faqiri pe KHabt-e-baadshahi kya