ek aisi an-kahi tahrir karne ja raha hun

ik aisī an-kahī tahrīr karne jā rahā huuñ

hunar ko aur bhī gambhīr karne jā rahā huuñ

mire ehsās meñ bechain jis ke ḳhāl-o-ḳhad haiñ

use har aañkh meñ tasvīr karne jā rahā huuñ

maiñ farhād-e-ma.ānī tīsha-e-harf-o-bayāñ se

suḳhan kī jhiil jū-e-shīr karne jā rahā huuñ

diloñ ke darmiyāñ rastoñ meñ kitne ḳham paḌe haiñ

maiñ un ko phir se sīdhā tiir karne jā rahā huuñ

vo jis meñ be-navāoñ ke lahū kī surḳhiyāñ haiñ

kulāh-e-shāh līr-o-līr karne jā rahā huuñ

mujhe zanjīrnā hai apne hisse kā zamāna

so apne aap ko tasḳhīr karne jā rahā huuñ

sadā tābīr-dar-tābīr jo rakkhe safar meñ

maiñ vo ḳhvāb-e-digar tāmīr karne jā rahā huuñ

ek aisi an-kahi tahrir karne ja raha hun

hunar ko aur bhi gambhir karne ja raha hun

mere ehsas mein bechain jis ke KHal-o-KHad hain

use har aankh mein taswir karne ja raha hun

main farhad-e-maani tisha-e-harf-o-bayan se

suKHan ki jhil ju-e-shir karne ja raha hun

dilon ke darmiyan raston mein kitne KHam paDe hain

main un ko phir se sidha tir karne ja raha hun

wo jis mein be-nawaon ke lahu ki surKHiyan hain

kulah-e-shah lir-o-lir karne ja raha hun

mujhe zanjirna hai apne hisse ka zamana

so apne aap ko tasKHir karne ja raha hun

sada tabir-dar-tabir jo rakkhe safar mein

main wo KHwab-e-digar tamir karne ja raha hun