ek ajab charKH-e-rawan hai kaenat-e-be-karan

ik 'ajab charḳh-e-ravāñ hai kā.enāt-e-be-karāñ

'āshiq-e-sādiq kī gardish hairat-e-charḳh-e-ravāñ

tark-e-duniyā se milegī dā.imī dīvāngī

ishq-e-fānī rā.egāñ 'ishq-e-haqīqī jāvedāñ

qalb par anvār vārid ho rahe haiñ 'arsh se

be-nihāyat rahmateñ vaj.h-e-sukūn-e-'āshiqāñ

'ishq ke sāzoñ meñ goyā bāda-e-gul-rang hai

naġhma-hā-e-be-ḳhudī raqs-e-qalandar sargirāñ

sab pe kaifiyyat 'ayāñ hotī nahīñ hai 'ishq kī

mubtalā-e-‘ishq par khultā hai ye rāz-e-nihāñ

'āshiq-e-haq jheltā hai qaid ḳhākī jism kī

manzil-e-maqsūd us kī bārgāh-e-mehrbāñ

tishna-kāmī sharbat-e-dīdār kī hai muntazir

'ishq kī me'rāj hai dīd-e-ḳhudā-e-do-jahāñ

ek 'ajab charKH-e-rawan hai kaenat-e-be-karan

'ashiq-e-sadiq ki gardish hairat-e-charKH-e-rawan

tark-e-duniya se milegi daimi diwangi

ishq-e-fani raegan 'ishq-e-haqiqi jawedan

qalb par anwar warid ho rahe hain 'arsh se

be-nihayat rahmaten wajh-e-sukun-e-'ashiqan

'ishq ke sazon mein goya baada-e-gul-rang hai

naghma-ha-e-be-KHudi raqs-e-qalandar sargiran

sab pe kaifiyyat 'ayan hoti nahin hai 'ishq ki

mubtala-e-‘ishq par khulta hai ye raaz-e-nihan

'ashiq-e-haq jhelta hai qaid KHaki jism ki

manzil-e-maqsud us ki bargah-e-mehrban

tishna-kaami sharbat-e-didar ki hai muntazir

'ishq ki me'raj hai did-e-KHuda-e-do-jahan