ek ajab wahshat se dil sinon mein be-kal ho gae

ik ajab vahshat se dil sīnoñ meñ be-kal ho ga.e

chāñd kyā niklā ḳhushī se log pāgal ho ga.e

dhuup se sahme parindoñ ko amaañ miltī nahīñ

saḳhti-e-mahr-e-ḳhizāñ se ḳhushk jañgal ho ga.e

raah meñ chhāñv zarā sī kar ga.ī mujh ko ḳharāb

do ghaḌī rukne se mere paañv bojhal ho ga.e

ab to bhartā hī nahīñ be-āb ā.īnoñ meñ rañg

kaun se manzar mirī āñkhoñ se ojhal ho ga.e

be-hisī āḳhir nikal aa.ī mire ġham kā ilaaj

barf rakhne se mire ghaav sabhī shal ho ga.e

kyā batā.ūñ bad-gumāñ dil meñ tamannāoñ kā haal

is zamīn-e-shor meñ sab peḌ be-phal ho ga.e

ek ajab wahshat se dil sinon mein be-kal ho gae

chand kya nikla KHushi se log pagal ho gae

dhup se sahme parindon ko aman milti nahin

saKHti-e-mahr-e-KHizan se KHushk jangal ho gae

rah mein chhanw zara si kar gai mujh ko KHarab

do ghaDi rukne se mere panw bojhal ho gae

ab to bharta hi nahin be-ab aainon mein rang

kaun se manzar meri aankhon se ojhal ho gae

be-hisi aaKHir nikal aai mere gham ka ilaj

barf rakhne se mere ghaw sabhi shal ho gae

kya bataun bad-guman dil mein tamannaon ka haal

is zamin-e-shor mein sab peD be-phal ho gae