ek dhan ko ek dhan se alag kar lun aur gaun

ik dhan ko ek dhan se alag kar luuñ aur gā.ūñ

sāñsoñ kā ik charāġh kahīñ dhar luuñ aur gā.ūñ

gandhār kī shuā chunūñ phir shu'ā'oñ se

yāqūt sat.h-e-sañg se chun kar luuñ aur gā.ūñ

sar-chashma-e-vajūd ko hargiz na chheḌūñ maiñ

koyal se ik irāda-e-tevar luuñ aur gā.ūñ

bheroñ meñ din nikaltā dikhā.ūñ maiñ dahr ko

aur sub.h tak charāġhoñ kī lo kar luuñ aur gā.ūñ

aur phail jā.ūñ chāroñ taraf bāzgasht sā

lab par tirā vazīfa-e-azbar luuñ aur gā.ūñ

aur dasht mere saath rahe bahtā megh meñ

bārish meñ apne vāste ik ghar luuñ aur gā.ūñ

koyal pukārtī rahe jāmun ke peḌ par

man meñ kisī nafas kā subū bhar luuñ aur gā.ūñ

kalyān ke ujāle meñ phirtī hai shab kahīñ

maiñ shaam hī se kāñdhe pe chādar luuñ aur gā.ūñ

aa jā.ūñ apnī gardish-e-sayyārgāñ ko maiñ

chakkar pe ek dūsrā chakkar luuñ aur gā.ūñ

ye vaqt hai bahā.e hue kā.enāt ko

naddī kī lahroñ se koī jhālar luuñ aur gā.ūñ

rahtī hai bas-ki raakh zamānoñ kī taaq par

maiñ bhī charāġh-e-hijr kā chakkar luuñ aur gā.ūñ

jalne lage jo shahr to saarā uñDel duuñ

jā kar kisī kināre se phir bhar luuñ aur gā.ūñ

āñgan meñ jāgte haiñ gul-o-lāla raat bhar

maiñ bhī kisī ke kāñToñ kā bistar luuñ aur gā.ūñ

āvāz chaknā-chūr ho shor-e-lahad ke biich

sañg-e-mazār se koī Thokar luuñ aur gā.ūñ

milnā kisī se raḳhna-e-āvārgī to hai

mil kar kisī se dūsrā mehvar luuñ aur gā.ūñ

ruḳhsat ke vaqt TuuT gayā jo pahāḌ thā

siine meñ tere paañv ke kankar luuñ aur gā.ūñ

lagne lagā hujūm-e-shar-angezī har taraf

yaksūī-e-ḳhumār ko hī sar luuñ aur gā.ūñ

jo jo parinda baiThā huā thā so uḌ gayā

pahlū meñ apnā ḳhālī sā pinjar luuñ aur gā.ūñ

din raat meñ baḌe baḌe aate haiñ inqalāb

lekin maiñ terā naam barābar luuñ aur gā.ūñ

jhukne lagī hai qaus-e-quzah sub.h-dam 'naved'

ye Tokarī gulāb kī sar par luuñ aur gā.ūñ

ek dhan ko ek dhan se alag kar lun aur gaun

sanson ka ek charagh kahin dhar lun aur gaun

gandhaar ki shua chunun phir shu'a'on se

yaqut sath-e-sang se chun kar lun aur gaun

sar-chashma-e-wajud ko hargiz na chheDun main

koyal se ek irada-e-tewar lun aur gaun

bheron mein din nikalta dikhaun main dahr ko

aur subh tak charaghon ki lo kar lun aur gaun

aur phail jaun chaaron taraf bazgasht sa

lab par tera wazifa-e-azbar lun aur gaun

aur dasht mere sath rahe bahta megh mein

barish mein apne waste ek ghar lun aur gaun

koyal pukarti rahe jamun ke peD par

man mein kisi nafas ka subu bhar lun aur gaun

kalyan ke ujale mein phirti hai shab kahin

main sham hi se kandhe pe chadar lun aur gaun

aa jaun apni gardish-e-sayyargan ko main

chakkar pe ek dusra chakkar lun aur gaun

ye waqt hai bahae hue kaenat ko

naddi ki lahron se koi jhaalar lun aur gaun

rahti hai bas-ki rakh zamanon ki taq par

main bhi charagh-e-hijr ka chakkar lun aur gaun

jalne lage jo shahr to sara unDel dun

ja kar kisi kinare se phir bhar lun aur gaun

aangan mein jagte hain gul-o-lala raat bhar

main bhi kisi ke kanTon ka bistar lun aur gaun

aawaz chakna-chur ho shor-e-lahad ke bich

sang-e-mazar se koi Thokar lun aur gaun

milna kisi se raKHna-e-awargi to hai

mil kar kisi se dusra mehwar lun aur gaun

ruKHsat ke waqt TuT gaya jo pahaD tha

sine mein tere panw ke kankar lun aur gaun

lagne laga hujum-e-shar-angezi har taraf

yaksui-e-KHumar ko hi sar lun aur gaun

jo jo parinda baiTha hua tha so uD gaya

pahlu mein apna KHali sa pinjar lun aur gaun

din raat mein baDe baDe aate hain inqalab

lekin main tera nam barabar lun aur gaun

jhukne lagi hai qaus-e-quzah subh-dam 'nawed'

ye Tokari gulab ki sar par lun aur gaun