ek dikhawa rah gaya bas dil se wo chahat gai

ik dikhāvā rah gayā bas dil se vo chāhat ga.ī

qais sahrā meñ gayā to ġhairat-e-vahshat ga.ī

ek hālat thī mirī aur ek hālat dil kī thī

merī hālat to vahī hai dil kī vo hālat ga.ī

chāñd ne dil kī ḳhalish ko chāñdnī kī shakl dī

haa.e merī be-dilī se kaisī shai ġhārat ga.ī

mahmil-e-lailā ke pīchhe gard thī aur qais thā

is sarāb-e-ārzū meñ hijr kī izzat ga.ī

ek kāñTe kī khaTak se dil mirā ābād thā

vo gayā to dil se mere dard kī rāhat ga.ī

bas burī niyyat ke phal kā ik kasīlā zā.iqa

ishq goyā rizq thā niyyat ga.ī barkat ga.ī

ek dikhawa rah gaya bas dil se wo chahat gai

qais sahra mein gaya to ghairat-e-wahshat gai

ek haalat thi meri aur ek haalat dil ki thi

meri haalat to wahi hai dil ki wo haalat gai

chand ne dil ki KHalish ko chandni ki shakl di

hae meri be-dili se kaisi shai ghaarat gai

mahmil-e-laila ke pichhe gard thi aur qais tha

is sarab-e-arzu mein hijr ki izzat gai

ek kanTe ki khaTak se dil mera aabaad tha

wo gaya to dil se mere dard ki rahat gai

bas buri niyyat ke phal ka ek kasila zaiqa

ishq goya rizq tha niyyat gai barkat gai