ek gardish-e-mudam bhi taqdir mein rahi

ik gardish-e-mudām bhī taqdīr meñ rahī

gard-e-safar bhī paañv kī zanjīr meñ rahī

ḳhvāboñ ke intiḳhāb meñ kyā chuuk ho ga.ī

har baar ik shikastagī ta.abīr meñ rahī

rañgoñ kā tāl-mel bahut ḳhuub thā magar

phir bhī koī kamī tirī tasvīr meñ rahī

chāragaroñ se dard kā darmāñ na ho sakā

allāh jaane kyā kamī tadbīr meñ rahī

kuchh der tak to zaḳhm se uljhī rahī davā

kuchh der tak to dard kī tāsīr meñ rahī

qātil ne saare daaġh to paanī se dho diye

taaza lahū kī bū jo thī shamshīr meñ rahī

sho.ala-bayānī go mirā tarz-e-suḳhan nahīñ

ik aañch sī magar mirī tahrīr meñ rahī

ek gardish-e-mudam bhi taqdir mein rahi

gard-e-safar bhi panw ki zanjir mein rahi

KHwabon ke intiKHab mein kya chuk ho gai

har bar ek shikastagi tabir mein rahi

rangon ka tal-mel bahut KHub tha magar

phir bhi koi kami teri taswir mein rahi

chaaragaron se dard ka darman na ho saka

allah jaane kya kami tadbir mein rahi

kuchh der tak to zaKHm se uljhi rahi dawa

kuchh der tak to dard ki tasir mein rahi

qatil ne sare dagh to pani se dho diye

taza lahu ki bu jo thi shamshir mein rahi

shoala-bayani go mera tarz-e-suKHan nahin

ek aanch si magar meri tahrir mein rahi