ek ghaDi jazba-e-nafrat ke siwa chahti hai

ik ghaḌī jazba-e-nafrat ke sivā chāhtī hai

zindagī tujh se mohabbat kī duā chāhtī hai

kyā karūñ dost to itne bhī nahīñ haiñ mere

roz ye ruuh koī zaḳhm nayā chāhtī hai

kyā ajab taur se kartī hai shikast apnī qubūl

ab ye duniyā koī hañgāma bapā chāhtī hai

jis mohabbat ke laboñ se kabhī jhaḌte the gulāb

ab vahī lahja-e-āshufta-navā chāhtī hai

jaan ko zaḳhm-e-tamannā se ifāqa na huā

phir na.e ishq meñ paimān-e-vafā chāhtī hai

shohrateñ Dhal ga.iiñ ik umr kī mānind so ab

mauj-e-rusvā.ī mire ghar kā patā chāhtī hai

mere hoñToñ kī tamannā bhī ajab hai 'āfāq'

us ke ruḳhsār pe ik phuul khilā chāhtī hai

ek ghaDi jazba-e-nafrat ke siwa chahti hai

zindagi tujh se mohabbat ki dua chahti hai

kya karun dost to itne bhi nahin hain mere

roz ye ruh koi zaKHm naya chahti hai

kya ajab taur se karti hai shikast apni qubul

ab ye duniya koi hangama bapa chahti hai

jis mohabbat ke labon se kabhi jhaDte the gulab

ab wahi lahja-e-ashufta-nawa chahti hai

jaan ko zaKHm-e-tamanna se ifaqa na hua

phir nae ishq mein paiman-e-wafa chahti hai

shohraten Dhal gain ek umr ki manind so ab

mauj-e-ruswai mere ghar ka pata chahti hai

mere honTon ki tamanna bhi ajab hai 'afaq'

us ke ruKHsar pe ek phul khila chahti hai