ek ishq-e-na-tamam hai ruswaiyan tamam

ik ishq-e-nā-tamām hai rusvā.iyāñ tamām

ugne lagī haiñ jism meñ tanhā.iyāñ tamām

kyā shahr-e-ārzū thā basā aur ujaḌ gayā

ab sar-kashīda phirtī haiñ purvā.iyāñ tamām

sāñsoñ ke zer-o-bam se hai sāġhar meñ iztirāb

jām-o-subū se pur-asar añgḌā.iyāñ tamām

roz-e-azal se sochte zehnoñ kī ham-safar

sahrā kī dhuup aur ye parchhā.iyāñ tamām

harf-o-sadā kī lai pe jo utrā tirā ḳhayāl

bajne lagī haiñ ġhazloñ meñ shahnā.iyāñ tamām

garche piro.e sher meñ jazbāt-e-rañg-o-bū

lekin bayāñ na ho sakīñ gahrā.iyāñ tamām

uThte rahe haiñ shaan se yārān-e-mai-kada

hotī rahī haiñ dahr se ra.anā.iyāñ tamām

aamad kā silsila nahīñ sher-o-suḳhan meñ aaj

phailī huī haiñ qāfiya-paimāeyāñ tamām

'zākir' nashist-e-dard maqām-e-ḳhirad bhī hai

mansūb is ḳhirad se hai bīnā.iyāñ tamām

ek ishq-e-na-tamam hai ruswaiyan tamam

ugne lagi hain jism mein tanhaiyan tamam

kya shahr-e-arzu tha basa aur ujaD gaya

ab sar-kashida phirti hain purwaiyan tamam

sanson ke zer-o-bam se hai saghar mein iztirab

jam-o-subu se pur-asar angDaiyan tamam

roz-e-azal se sochte zehnon ki ham-safar

sahra ki dhup aur ye parchhaiyan tamam

harf-o-sada ki lai pe jo utra tera KHayal

bajne lagi hain ghazlon mein shahnaiyan tamam

garche piroe sher mein jazbaat-e-rang-o-bu

lekin bayan na ho sakin gahraiyan tamam

uThte rahe hain shan se yaran-e-mai-kada

hoti rahi hain dahr se ranaiyan tamam

aamad ka silsila nahin sher-o-suKHan mein aaj

phaili hui hain qafiya-paimaeyan tamam

'zakir' nashist-e-dard maqam-e-KHirad bhi hai

mansub is KHirad se hai binaiyan tamam