ek lafz-e-mohabbat ke bane lakh fasane

ik lafz-e-mohabbat ke bane laakh fasāne

tohmat ke bahāne kabhī shohrat ke bahāne

kis ko ye ḳhabar thī ki bikhar jā.eñge pal meñ

āñkhoñ ne sajā rakkhe the jo ḳhvāb suhāne

ik zaḳhm-e-judā.ī hai ki nāsūr banā hai

kartā huuñ tujhe yaad isī ġham ke bahāne

aqdār kā fuqdān havasnākī-o-vahshat

sab parde haTā rakkhe haiñ ab sharm-o-hayā ne

furqat kī shab-e-karb ke jaate hue lamho

kab lauT ke aaoge mujhe phir se rulāne

bhāne lagī jab dil ko zarā bazm kī raunaq

tanhā.ī mirī aa ga.ī phir mujh ko manāne

vo gul huuñ jo Thahrāyā gayā tañg-e-bahārāñ

pāmāl kiyā ḳhud hī jise bād-e-sabā ne

shākir huuñ maiñ har haal meñ rāzī-ba-razā huuñ

taskīn kī daulat mujhe baḳhshī hai ḳhudā ne

āzār-e-ġham-e-dil ko na honā thā shifāyāb

kuchh kaam kiyā 'chāñd' davā ne na duā ne

ek lafz-e-mohabbat ke bane lakh fasane

tohmat ke bahane kabhi shohrat ke bahane

kis ko ye KHabar thi ki bikhar jaenge pal mein

aankhon ne saja rakkhe the jo KHwab suhane

ek zaKHm-e-judai hai ki nasur bana hai

karta hun tujhe yaad isi gham ke bahane

aqdar ka fuqdan hawasnaki-o-wahshat

sab parde haTa rakkhe hain ab sharm-o-haya ne

furqat ki shab-e-karb ke jate hue lamho

kab lauT ke aaoge mujhe phir se rulane

bhane lagi jab dil ko zara bazm ki raunaq

tanhai meri aa gai phir mujh ko manane

wo gul hun jo Thahraya gaya tang-e-bahaaran

pamal kiya KHud hi jise baad-e-saba ne

shakir hun main har haal mein raazi-ba-raza hun

taskin ki daulat mujhe baKHshi hai KHuda ne

aazar-e-gham-e-dil ko na hona tha shifayab

kuchh kaam kiya 'chand' dawa ne na dua ne