ek lamha-e-visal se aage nikal gai

ik lamha-e-visāl se aage nikal ga.ī

maiñ ḳhvāhishoñ ke jaal se aage nikal ga.ī

chehre pe us ke rañj ke āsār dekh kar

chup-chāp har savāl se aage nikal ga.ī

kuchh maiñ bhī nā-shanās thī is kār-e-ḳhair meñ

har rañj har malāl se aage nikal ga.ī

aise ġham-e-hayāt ne bāñhoñ meñ le liyā

maiñ apnī dekh-bhāl se aage nikal ga.ī

kuchh din tire visāl ne mad.hosh kar diyā

maiñ ḳhvāhish-e-ma.āl se aage nikal ga.ī

tū bhī mire vajūd se āzād ho gayā

maiñ bhī tire ḳhayāl se aage nikal ga.ī

ek lamha-e-visal se aage nikal gai

main KHwahishon ke jal se aage nikal gai

chehre pe us ke ranj ke aasar dekh kar

chup-chap har sawal se aage nikal gai

kuchh main bhi na-shanas thi is kar-e-KHair mein

har ranj har malal se aage nikal gai

aise gham-e-hayat ne banhon mein le liya

main apni dekh-bhaal se aage nikal gai

kuchh din tere visal ne madhosh kar diya

main KHwahish-e-maal se aage nikal gai

tu bhi mere wajud se aazad ho gaya

main bhi tere KHayal se aage nikal gai