ek main hi tere hijr se bezar kahan tha

ik maiñ hī tire hijr se bezār kahāñ thā

har shaḳhs mire saath yahāñ nauha-kunāñ thā

aatī hai mujhe raakh nazar hadd-e-nazar tak

vo vaqt bhī guzrā hai ki phūloñ kā samāñ thā

ai mujh se bichhaḌne kā sabab pūchhne vaale

vo shaḳhs mirī jaan nahīñ dushman-e-jāñ thā

jo jaan chhiḌakte the vahī kahte haiñ mujh se

tū halqa-e-ahbāb meñ shāmil hī kahāñ thā

afsos tū imdād ko bar-vaqt na pahuñchā

ghar jal ke huā ḳhaak har ik samt dhuāñ thā

ye sach hai ki hoñToñ se pukārā na tirā naam

āñkhoñ meñ tirī diid kā manzar to ayaañ thā

maiñ chaltā rahā saañs kī gaThrī ko uThā.e

manzil thī mire paas na manzil kā nishāñ thā

maiñ jis ko bhulāne meñ bahut karb se guzrā

vo shaḳhs mire jism kī har rag meñ ravāñ thā

ek main hi tere hijr se bezar kahan tha

har shaKHs mere sath yahan nauha-kunan tha

aati hai mujhe rakh nazar hadd-e-nazar tak

wo waqt bhi guzra hai ki phulon ka saman tha

ai mujh se bichhaDne ka sabab puchhne wale

wo shaKHs meri jaan nahin dushman-e-jaan tha

jo jaan chhiDakte the wahi kahte hain mujh se

tu halqa-e-ahbab mein shamil hi kahan tha

afsos tu imdad ko bar-waqt na pahuncha

ghar jal ke hua KHak har ek samt dhuan tha

ye sach hai ki honTon se pukara na tera nam

aankhon mein teri did ka manzar to ayan tha

main chalta raha sans ki gaThri ko uThae

manzil thi mere pas na manzil ka nishan tha

main jis ko bhulane mein bahut karb se guzra

wo shaKHs mere jism ki har rag mein rawan tha