ek masafat panw shal karti hui si KHwab mein

ik masāfat paañv shal kartī huī sī ḳhvāb meñ

ik safar gahrā musalsal zardī-e-mahtāb meñ

tez hai bū-e-shagūfa haa.e marg-e-nā-gahāñ

ghir ga.ī ḳhāk-e-zamīñ jaise hisār-e-āb meñ

hāsil-e-johd-e-musalsal mustaqil āzurdagī

kaam kartā huuñ havā meñ justujū nāyāb meñ

tañg kartī hai makāñ meñ ḳhvāhish-e-sair-e-basīt

hai asar daa.im falak kā sahn kī mehrāb meñ

ai 'munīr' ab is qadar ḳhāmoshiyāñ ye kyā huā

ye sifat aa.ī kahāñ se pāra-e-sīmāb meñ

ek masafat panw shal karti hui si KHwab mein

ek safar gahra musalsal zardi-e-mahtab mein

tez hai bu-e-shagufa hae marg-e-na-gahan

ghir gai KHak-e-zamin jaise hisar-e-ab mein

hasil-e-johd-e-musalsal mustaqil aazurdagi

kaam karta hun hawa mein justuju nayab mein

tang karti hai makan mein KHwahish-e-sair-e-basit

hai asar daim falak ka sahn ki mehrab mein

ai 'munir' ab is qadar KHamoshiyan ye kya hua

ye sifat aai kahan se para-e-simab mein