ek nahin main hi shahid-e-talKHi-e-guftar-e-dost

ik nahīñ maiñ hī shahīd-e-talḳhī-e-guftār-e-dost

saarā 'ālam hai qatīl-e-dashna-e-kirdār-e-dost

jalva-farmā vo hue haiñ aur na hoñge hashr tak

kam huī hai aur na hogī hasrat-e-dīdār dost

'aks-e-ruḳh se mai-kada kā mai-kada gulnār hai

surḳhī-e-mai hai ki hai gul-gūnī-e-ruḳhsār-e-dost

tuur ke mānind jalne ko kaleje chāhiye

koh lā saktā hai tāb-e-jalva-e-dīdār-e-dost

ġhunche us ke naġhma-e-raftār se bante haiñ phuul

gul khilātī hai chaman meñ shoḳhī-e-raftār dost

kal agar muusā na us kī tāb-e-jalva lā sake

aaj bhī kis ko hai tāb-e-jalva-e-dīdār-e-dost

saarī tārīḳh-e-karam us kī jafāoñ par nisār

koī mere dil se pūchhe lazzat-e-āzār-e-dost

haañ yūñhī chhalkā kare 'parvāz' sub.h-e-hashr tak

raat kī ḳhāmoshiyoñ meñ chashma-e-guftār-e-dost

ek nahin main hi shahid-e-talKHi-e-guftar-e-dost

sara 'alam hai qatil-e-dashna-e-kirdar-e-dost

jalwa-farma wo hue hain aur na honge hashr tak

kam hui hai aur na hogi hasrat-e-didar dost

'aks-e-ruKH se mai-kada ka mai-kada gulnar hai

surKHi-e-mai hai ki hai gul-guni-e-ruKHsar-e-dost

tur ke manind jalne ko kaleje chahiye

koh la sakta hai tab-e-jalwa-e-didar-e-dost

ghunche us ke naghma-e-raftar se bante hain phul

gul khilati hai chaman mein shoKHi-e-raftar dost

kal agar musa na us ki tab-e-jalwa la sake

aaj bhi kis ko hai tab-e-jalwa-e-didar-e-dost

sari tariKH-e-karam us ki jafaon par nisar

koi mere dil se puchhe lazzat-e-azar-e-dost

han yunhi chhalka kare 'parwaz' subh-e-hashr tak

raat ki KHamoshiyon mein chashma-e-guftar-e-dost