ek nai subh ka aaghaz hai anjam ke baad

ik na.ī sub.h kā āġhāz hai anjām ke ba.ad

phir vahī silsila-e-ishq hai ilzām ke ba.ad

jaane kyā hogā mirī sa.ī-e-talab kā hāsil

zehn meñ kuchh nahīñ mahfūz tire naam ke ba.ad

sehn-e-gulshan meñ bahāroñ kā nishāñ tak bhī nahīñ

ḳhaak uḌtī hai faqat gardish-e-ayyām ke ba.ad

sub.h se karb-o-aziyyat kā ye aalam tauba

dard kuchh aur sivā hotā hai har shaam ke ba.ad

us se pahle to har ik azm-o-amal hai be-sūd

qalb-e-muztar ko sukūñ miltā hai ālām ke ba.ad

us ne kuchh aur ḳhitābāt diye haiñ ḳhat meñ

saath vahshī bhī likhā hai mujhe badnām ke ba.ad

merī jānib bhī ḳhizar bazm-e-adū meñ ik din

us kī maḳhsūs nazar thī nigah-e-ām ke ba.ad

ek nai subh ka aaghaz hai anjam ke baad

phir wahi silsila-e-ishq hai ilzam ke baad

jaane kya hoga meri sai-e-talab ka hasil

zehn mein kuchh nahin mahfuz tere nam ke baad

sehn-e-gulshan mein bahaaron ka nishan tak bhi nahin

KHak uDti hai faqat gardish-e-ayyam ke baad

subh se karb-o-aziyyat ka ye aalam tauba

dard kuchh aur siwa hota hai har sham ke baad

us se pahle to har ek azm-o-amal hai be-sud

qalb-e-muztar ko sukun milta hai aalam ke baad

us ne kuchh aur KHitabaat diye hain KHat mein

sath wahshi bhi likha hai mujhe badnam ke baad

meri jaanib bhi KHizar bazm-e-adu mein ek din

us ki maKHsus nazar thi nigah-e-am ke baad