ek nashtar-e-nigah hai is se ziyaada kya

ik nashtar-e-nigāh hai is se ziyāda kyā

dam bhar kī aah aah hai is se ziyāda kyā

gardan se tauq-e-ḳhauf-o-talab ko nikāl dekh

phir koī bādshāh hai is se ziyāda kyā

tāqat agar hai paañv meñ sahrā kā ḳhauf kyuuñ

bas ik kushāda raah hai is se ziyāda kyā

vo to havā thī band na muTThī meñ ho sakī

ab rañj ḳhvāh-maḳhvāh hai is se ziyāda kyā

bāloñ ko apne chhoḌ mirī shām-e-ġham ko dekh

phir dekh kuchh siyāh hai is se ziyāda kyā

har-chand aaj bhī hai vahī kasrat-e-umīd

haarī huī sipāh hai is se ziyāda kyā

ik kañkarī uchhāl ke toḌo tilism-e-tāb

paanī meñ aks-e-māh hai is se ziyāda kyā

haiñ kāmyāb jin kā yahāñ jī nahīñ lagā

duniyā kī dars-gāh hai is se ziyāda kyā

ghaTtā hī jā.egā ye latāfat ke saath saath

ye jism zād-e-rāh hai is se ziyāda kyā

ḳhūn-e-jigar se sher likho aur mā-hasal

dam bhar kī vāh-vāh hai is se ziyāda kyā

ek nashtar-e-nigah hai is se ziyaada kya

dam bhar ki aah aah hai is se ziyaada kya

gardan se tauq-e-KHauf-o-talab ko nikal dekh

phir koi baadshah hai is se ziyaada kya

taqat agar hai panw mein sahra ka KHauf kyun

bas ek kushada rah hai is se ziyaada kya

wo to hawa thi band na muTThi mein ho saki

ab ranj KHwah-maKHwah hai is se ziyaada kya

baalon ko apne chhoD meri sham-e-gham ko dekh

phir dekh kuchh siyah hai is se ziyaada kya

har-chand aaj bhi hai wahi kasrat-e-umid

haari hui sipah hai is se ziyaada kya

ek kankari uchhaal ke toDo tilism-e-tab

pani mein aks-e-mah hai is se ziyaada kya

hain kaamyab jin ka yahan ji nahin laga

duniya ki dars-gah hai is se ziyaada kya

ghaTta hi jaega ye latafat ke sath sath

ye jism zad-e-rah hai is se ziyaada kya

KHun-e-jigar se sher likho aur ma-hasal

dam bhar ki wah-wah hai is se ziyaada kya